نصائح تربوية

🍂 نصائح تربوية 🍂

👌لو عندك طفل أقل من 10 سنوات..البوست ده مهم جداً ليك..
.
✋👈 التربيه فى 2018 قطعاً لازم تختلف عن تربية الأطفال سنة 90 مثلاً..

لأن في تغيرات مجتمعية وتكنولوجية ومعرفية كبيرة حصلت..
فماينفعش تعمل مع طفلك زي اللي كان والديك بيعملوه معاك ..

👈 في نقط مهمة لازم تدركها وهي كالآتى :-

1- ابعد عن التدليل الزائد..مش كل حاجة ابنك يقلك عاوزها تجيبهاله...
فهمه إن كل حاجة ليها وقتها..ولما يطلب منك 3 أو أربع حاجات..هاتله حاجة دلوقتى..واتفق معاه إنك هتجيله حاجة تانية الأسبوع الجاى أو الشهرالقادم ..

الموضوع مش مرتبط بمقدرتك إنك تجيبله ولا لأ ..
الموضوع مرتبط إن تلبية كل الطلبات منطقية كانت أو غير منطقية هو أمر مضر جداً بشخصية الطفل ..

2- دا مش معناه إنك مش هتجيبله اللي هيطلبه .. هاتله كل اللي يطلبه بس على مراحل..لا يحرم من شيء ولكن يتعلم النظام فى تلبية الطلب ..
الصبر..يفرح بالحاجة اللي تجيله بعد مجهود...هتفرق جداً معاه في شخصيته مستقبلاً..
.
3- خليه كل يوم يعتمد على نفسه في حاجة معينة ..
يعنى مثلاً يعمل ساندوتش لنفسه (خارج المطبخ)...يرتب سريره ..
ينظف حذاءه .. يرتب شنطة مدرسته .. وبعد مايعمل دا ..
اعمل احتفال ليه كأنه عمل انجاز .. وكافأه واحكي الموقف دا لناس تانية قدامه ... هتزرع الثقة والاعتماد على النفس بشكل كبير فيه.
.
4- خد رأيه فى حاجات كتير .. وامشى على رأيه .. مثلاً لو ماشى معاه في الشارع .. قوله نمشي من الطريق دا والا  دا (هو لا عارف دا ولا دا).... بس دا هيكون مؤثر جداً بشكل إيجابي في شخصيته..
هيعرف يعبر عن رأيه ويثق فيه..وهيكون شخصية مستقلة بشكل صحيح.
.
5- خليه يحكي قصص..وسجله فيديو مثلاً بالموبايل..وخليه يسمع نفسه وهو بيتكلم..وممكن توجهه إنك قلت كذا..والأفضل تقول دي بالشكل الفلانى .. وسجله تاني .. وخليه يقارن بين الجديد والقديم ... هيتعلم بسرعة ..هيعرف يعبر .. هيعرف إن لو أخطأ هيكون في فرصة للتعديل..هيبقى فخور بنفسه..
.
6- أي إنسان حتى لو طفل..محتاج التقدير المعنوي .. وبيكره التوجيه المباشر .. وبيستنكر الهجوم والتعنيف عليه.. وبيبتعد عن اللي بيتسلط عليه في المعاملة ..
فخليك هين لين سهل قريب منه .
.
7- اعمل جدول معاه في حفظ القرآن .. واتفق معاه على هدية تجيبهاله في كل سورة يحفظها .. واعمله احتفال كبير لكل جزء يخلصه .. (دا ليك في الآخرة قبل مايكون ليه في الدنيا).
.
8- حسسه دايماً إنك معاه..وإنه مايخافش من حاجة .. وإن أي حاجة تحصل هتكون معاه فيها ..الإحساس بالإطمئنان مهم للصغار كما هو مهم للكبار.
.
9- اديله جزء من الحريه في تصرفاته .. حتى لو شايفه بيعمل حاجة غلط ..
خليه يكملها..ويشوف نتيجتها (وانت مراقبه)..وبعد مايخلص اتكلم معاه عن التصرف والنتيجه..
.
10- علمه كلمات معينة يقولها .. زي حاضر .. نعم .. من فضلك ..لو سمحت .. شكراً .. آسف..
طور لغة كلامه لطريقة راقية من صغره.
.
.
خليك فاكر إن أول 10 سنين فى حياة الطفل .. هما تكوين شخصيته طول حياته .. ❗️